Wednesday, September 24, 2008

ಅಮ್ಮು ...ಅಮ್ಮ...


ಯಾರು ನನ್ನ ಚಿನ್ನ ರನ್ನ?
ನಾನು ನಾನು ನಾನು
ಅದನ್ ಸದಾ ಹಾಕ್ಕೋಳೋಳು
ನೀನು ನೀನು ನೀನು

ಯಾರು ನನ್ನ ಕಳ್ಳ ಕೃಷ್ಣ?
ನಾನು ನಾನು ನಾನು
ಹಾಲು ಬೆಣ್ಣೆ ತಿನ್ಸೋ ಗೋಪಿ?
ನೀನು ನೀನು ನೀನು

ತಿಂಡಿ ಕದ್ದು ತಿನ್ನೋ ಇಲಿ?
ನಾನು ನಾನು ನಾನು
ಕಿವಿ ಹಿಂಡಿ ಬಿಡಿಸಿ ಬೈಯೋಳ್?
ನೀನು ನೀನು ನೀನು

ಹಿಡಿದು ಬಡಿದು ಹೊಡೆದು ಕಡೆಗೆ
ಸೋಲೋದ್ ಯಾರು? ನೀನು!
ಅತ್ತು,ಕರೆದು ಬೈಸಿಕೊಂಡ್ರೂ
ಕಡೆಗ್ ಗೆಲ್ಲೋದ್? ನಾನು!

-ಲಕ್ಶ್ಮೀ ನಾರಾಯಣ ಭಟ್ಟ
ನನ್ನ ಚಿನ್ನ ರನ್ನ ಅಮ್ಮುನ ಸದಾ ಹಾಕ್ಕೋಳೋಳು ನಾನೇ ಆದ್ರೂ ಉಳಿದ ಮೂರು ನುಡಿಗಳು ಸದ್ಯಕ್ಕೆ ಅಮ್ಮುವಿನ ಮಟ್ಟಿಗೆ ಜಾರಿಯಲ್ಲಿಲ್ಲ! ಸದ್ಯ....

Saturday, September 20, 2008

ಲಾಲೀ ಮುದ್ದು ಲಾಲೀ ,ಚಿನ್ನ ಲಾಲೀ...


ಲಾಲೀ ಮುದ್ದು ಲಾಲೀ ,ಚಿನ್ನ ಲಾಲೀ

ತೊಟ್ಟಲಿನೊಳಗೆ ಪುಟ್ಟ ಕಂದ ಮಲಗಿಹನು
ಸೃಷ್ಟಿಗೊಡೆಯನ ಮಡದಿಯ,ಪಾರ್ವತಿ ದೇವಿ
ದೃಷ್ಟಿ ತಗುಲೀತು ತೆರೆ ಹಾಕ...

ಲಾಲೀ ಮುದ್ದು ಲಾಲೀ ,ಚಿನ್ನ ಲಾಲೀ

ಅಳಬೇಡ ನನ ಕಂದ ನಿನಗೆ ಜೋಗುಳ ಹಾಡಿ
ಹುಣ್ಣಿಮೆ ಹಾಲು ತಂದು ಉಣಿಸೇನ,ಮಾವನ ಮಗಳ
ಕರ ತಂದು ಧಾರೆ ಎರೆದೇನ....

ಲಾಲೀ ಮುದ್ದು ಲಾಲೀ ,ಚಿನ್ನ ಲಾಲೀ


ನನ್ನಯ್ಯನಂತೋರು ಹನ್ನೆರಡು ಮಕ್ಕಳು
ಹೊನ್ನೆಯ ಮರದ ನೆರಳಾಗ ಆಡುವಾಗ
ಸನ್ಯಾಸಿ ಜಪವಾ ಮರೆತಾನೂ...

ಲಾಲೀ ಮುದ್ದು ಲಾಲೀ ,ಚಿನ್ನ ಲಾಲೀ

Saturday, September 13, 2008

ಚಿಂವ್ ಚಿಂವ್ ಗುಬ್ಬಿ...


ಗುಬ್ಬಿ ಗುಬ್ಬಿ
ಚಿಂವ್ ಚಿಂವ್
ಎಂದು ಕರೆಯುವೆ ಯಾರನ್ನು?

ಆಚೆ ಈಚೆ
ಹೊರಳಿಸಿ ಕಣ್ಣು
ನೋಡುವೆ ಏನನ್ನು?

ಮೇಲೆ ಕೆಳಗೆ
ಕೊಂಕಿಸಿ ಕೊರಳನು
ಹುಡುಕುವೆ ಏನಲ್ಲಿ?

ಕಾಳನು ಹುಡುಕುತ
ನೀರನು ನೋಡುತ
ಅಲೆಯುವೆ ಏಕಿಲ್ಲಿ?

ಕಾಳನು ಕೊಟ್ಟು
ನೀರನು ಕುಡಿಸುವೆ
ಆಡಲು ಬಾ ಇಲ್ಲಿ

ಹಣ್ಣನು ಕೊಟ್ಟು
ಹಾಲನು ನೀಡುವೆ
ನಲಿಯಲು ಬಾ ಇಲ್ಲಿ

-ಎ.ಕೆ.ರಾಮೇಶ್ವರ

Thursday, September 11, 2008

ಗಿಂಡಿ Vs ವಾಟರ್ ಬಾಟಲ್

ಬಾಟಲ್ ನನ್ನ ಒಲವಿನ ವಾಟರ್ ಬಾಟಲ್...

**********
ನನಗಾಗ ಸುಮಾರು ನಾಲ್ಕು ವರ್ಷವಿರಬಹುದು.
ಒಂದು ದಿನ ಅಟ್ಟದಲ್ಲಿ ಏನೋ ಹುಡುಕುತ್ತಿದ್ದ ಅಮ್ಮ ಹಳೆ ಪಾತ್ರೆಗಳ ನಡುವೆ ಸುಖವಾಗಿ ಮಲಗಿದ್ದ ಸಣ್ಣ ಗಿಂಡಿಯೊಂದನ್ನು ಅಪ್ಪಿ ತಪ್ಪಿ ಹೊರ ತೆಗೆದು ಹಾಕಿಬಿಟ್ಟರು ಮತ್ತು ಆ ಪಾಪದ ಪ್ರಾಣಿ ನನ್ನ ಕಣ್ಣಿಗೆ ಆಕ್ಷಣ ಬಿದ್ದು ಬಿಟ್ಟಿತು
ಶುರುವಾಯಿತಲ್ಲ ಆ ಗಿಂಡಿಗೆ ಶನಿ ದೆಸೆ...

"ಗಿಂಡಿ ತುಂಬಾ ಪುಟ್ಟ ಪಾಪುಗಳು ಹಾಲು ಕುಡಿಯುವುದು ಕಣೆ" ಅಂತ ಅಮ್ಮ ಎಷ್ಟೆಷ್ಟು ಸಮಜಾಯಿಸಿದರೂ ಕೇಳದೆ ನಾನು ಇನ್ನು ಮೇಲೆ ಗಿಂಡಿಯಲ್ಲೇ ಹಾಲು ಕುಡಿಯುವುದು ಅಂತ ಹಟಮಾಡತೊಡಗಿದೆ
ಅಷ್ಟೊತ್ತಿಗೆ ನನ್ನ ತಂಗಿ ಕೂಡಾ ಲೋಟದಲ್ಲಿ ಕುಡಿಯಲು ಶುರು ಮಾಡಿದ್ದಳೆಂದರೆ ಮನೆಯವರಿಗೆಲ್ಲಾ ನನ್ನ ಹಟ ಎಷ್ಟು ತಮಾಶೆ ಎನ್ನಿಸಿರಬೇಡ...!

`ಸರಿ ಕುಡ್ಕೋ ಹೋಗ್' ಅಂತ ಅಮ್ಮ ಸುಮ್ಮನಾಗಿ ಬಿಟ್ಟರು
ಆ ಗಿಂಡಿಯಲ್ಲಿ ಹಾಲು ಹಾಕಿದರೆ ಅದು ಸೋರಲು ಶುರವಾಗಬೇಕೇ..?
ನಾನು ಬಿಡುತ್ತೇನೆಯೇ...ಗಿಂಡಿ ತಳದಲ್ಲಿ ಒಂದು ತಟ್ಟೆ ಇರಿಸಿಕೊಂಡು ಕುಡಿಯಲೆತ್ನಿಸಿದೆ
ಹೇಳೀ ಕೇಳಿ ಅದು ಪಾಪುಗಳು ಕುಡಿಯುವ ಗಿಂಡಿ ಒಂದು ಸಾರಿಗೆ ಕಾಲು ಲೋಟ ಹಾಲು ಹಿಡುಸುತ್ತಿತ್ತು ಅಷ್ಟೇ
ಹಾಕಿದ ಹಾಲೆಲ್ಲಾ ಸುರಿದು ಹೋದರೆ ಒಂದು ಲೋಟ ಹಾಲು ಕುಡಿಯಲು ನಾನೆಷ್ಟು ಶ್ರಮ ಪಟ್ಟಿರಬಹುದು ಯೋಚಿಸಿ..
ನಾನು ಛಲ ಬಿಡದ ತ್ರಿವಿಕ್ರಮನಂತೆ ಆ ತೂತು ಗಿಂಡಿಯಲ್ಲೇ ಹಾಲು ಕುಡಿಯತೊಡಗಿದೆ
ನನ್ನ ಗಿಂಡಿ ಹುಚ್ಚು ಎಲ್ಲಿಗೆ ಹೋಯಿತೆಂದರೆ ಗಿಂಡಿಯಲ್ಲಿ ನೀರು ತುಂಬಿಕೊಂಡು ದಿನವೆಲ್ಲಾ ಕುಡಿಯಲು ಶುರು ಮಾಡಿದೆ
ಕೊನೆಗೆ ನೀರು ಕುಡಿದೂ ಕುಡಿದೂ ರಾತ್ರಿ ಹೊಟ್ಟೆ ನೋವು ಬಂತು
ನಾನು ಗಿಂಡಿಗೆ ಬೈ ಬೈ ಹೇಳಿದ್ದು ಹೀಗೆ...
***********


ಹಾಲಿಗಿಂಥ ನೀರೇನೇ ಚಂದವೂ....
ತುತ್ತು ಅನ್ನತಿನ್ನದೇ ಇದ್ದರೂ ಹತ್ತು ಬಾಟಲ್ ನೀರು ಕುಡಿಯಿರಿ...
ಕಾವೇರಿಗೇ ಜೈ...

ಯಾರೇ ಕೂಗಾಡಲೀ...
ನೀರೇ ನಿನಗೆ ಸಾಟಿ ಇಲ್ಲ...
ಅರೆ ಹೊಯ್ ಅರೆ ಹೊಯ್
ಟುರ್ ಬ್ಯಾ.....
**************
ಆರವ್ ಹತ್ತಿರ ಇದ್ದ ವಾಟರ್ ಬಾಟಲ್ ನೋಡಿ ಅಮರ್ತ್ಯ ತುಂಬಾ ಆಸೆ ಪಟ್ಟಿದ್ದರಿಂದ ಅವನಿಗೂ ವಾಟರ್ ಬಾಟಲ್ ಕೊಡಿಸಿದ್ದೇವೆ
ಮೂರು ದಿನದಿಂದ ಏನೂ ತಿನ್ನದೆ ಹಾಲು ಕೂಡಾ ಕುಡಿಯದೆ ಬರೀ ನೀರು ಕುಡಿಯುತ್ತಿದ್ದಾನೆ
`ಸರಿ ಕುಡ್ಕೋ ಹೋಗ್' ಅಂತ ಬಿಟ್ಟು ಬಿಡಲು ನನಗೇಕೋ ಆಗುತ್ತಿಲ್ಲ
ಇವನಿಗೆ ಹೊಟ್ಟೆ ನೋವು ಯಾವಾಗ ಬರುತ್ತೆ ಅಂತ ಕಾಯುತ್ತಿದ್ದೇನೆ
ಅವನು ಘಳಿಗೆಗೊಂದು ಸಾರಿ ಉಚ್ಚೆ ಮಾಡಿಕೊಂದು ನನ್ನನ್ನು ಸತಾಯಿಸುತ್ತಿದ್ದಾನೆ.

Thursday, September 4, 2008

ಪಾರ್ಕಿ ಗೆ ಹೋದಾಗ...




ಅಮರ್ತ್ಯನನ್ನೂ ಆರವ್ ನನ್ನೂ ಒಂದು ಭಾನುವಾರ ಪಾರ್ಕಿಗೆ ಕರಕೊಂಡು ಹೋಗಿದ್ದೆವು ಇಬ್ಬರೂ ಕುಣಿದು ಕುಪ್ಪಳಿಸಿದರು
ಜಾರು ಬಂದೆ ಜಾರಿದರು ಆಟದ ಕುದುರೆಸವಾರಿ ಮಾಡಿದರು ಮತ್ತು ಚೆಂಡಾಡಿದರು ಫೋಟೋ ತೆಗೆದದ್ದು ಸೋಮ್ ಅಂಕಲ್


Friday, August 29, 2008

ನಂದಗೋಕುಲದಲ್ಲಿ ಇಬ್ಬರು ಕೃಷ್ಣರು!




ಮೊನ್ನೆ ಕೃಷ್ಣ ಜನ್ಮಾಷ್ಟಮಿ ಯ ದಿನ ಅಮರ್ತ್ಯನಿಗೂ ಅವನ ಸ್ನೇಹಿತ ಆರವ್ ನಿಗೂ ಕೃಷ್ಣನ ಅಲಂಕಾರ ಮಾಡಿದ್ದೆವು
ಇಬ್ಬರು ತುಂಟ ಕೃಷ್ಣರೂ ಮನೆತುಂಬಾ ಓಡಾಡಿ ನಗು ಚೆಲ್ಲಿ ನಮ್ಮೆಲ್ಲರನ್ನೂ ನಲಿದಾಡಿಸಿದರು




















Monday, August 11, 2008

ತಟ್ಟಿ ತಟ್ಟೀ ರಂಗಯ್ಯ

ತಟ್ಟೀ ತಟ್ಟಿ ರಂಗಯ್ಯಾ
ಕಾಳಿ ಮುದ್ದು ರಂಗಯ್ಯ
ಬಾಯಿಗೆ ಬೆಣ್ಣೆ ಇಡಿಸಯ್ಯ
ಕಣ್ಣಿಗೆ ನಿದ್ದೆ ಬರಿಸಯ್ಯ
ತಟ್ಟೀ ತಟ್ಟಿ ರಂಗಯ್ಯಾ

ತಟ್ಟೀ ತಟ್ಟಿ ರಂಗಯ್ಯಾ
ರನ್ನದಗುಂಡು ರಂಗಯ್ಯ
ಚಿನ್ನದ ತಟ್ಟೆ ತರಿಸಯ್ಯ
ತುಪ್ಪ ಅನ್ನ ಉಣಿಸಯ್ಯ
ಕಣ್ಣಿಗೆ ನಿದ್ದೆ ಬರಿಸಯ್ಯ
ತಟ್ಟೀ ತಟ್ಟಿ ರಂಗಯ್ಯಾ

ತಟ್ಟೀ ತಟ್ಟಿ ರಂಗಯ್ಯಾ
ಬೆಳ್ಳಿ ಕಡಗದ ರಂಗಯ್ಯ
ಪಚ್ಚೆ ಬಟ್ಟಲ ತರಿಸಯ್ಯ
ಸಕ್ಕರೆ ಸಜ್ಜಿಗೆ ಉಣಿಸಯ್ಯ
ಕಣ್ಣಿಗೆ ನಿದ್ದೆ ಬರಿಸಯ್ಯ
ತಟ್ಟೀ ತಟ್ಟಿ ರಂಗಯ್ಯಾ

ತಟ್ಟೀ ತಟ್ಟಿ ರಂಗಯ್ಯಾ
ಮುತ್ತಿನಪದಕ ರಂಗಯ್ಯ
ಬೆಳ್ಳಿಲೋಟವ ತರಿಸಯ್ಯ
ಕೇಸರಿ ಹಾಲು ಕುಡಿಸಯ್ಯ
ಕಣ್ಣಿಗೆ ನಿದ್ದೆ ಬರಿಸಯ್ಯ
ತಟ್ಟೀ ತಟ್ಟಿ ರಂಗಯ್ಯಾ

ಇಂಡಿಯಾಗೆ ಹೋದಾಗ ಈಹಾಡಿನ ಮೊದಲ ನುಡಿ ಕೇಳಿದ್ದು ಅಮ್ಮುವಿನ ಅಜ್ಜಿ ಬಾಯಲ್ಲಿ. ಮಿಕ್ಕ ನುಡಿಗಳನ್ನು ನಾನೇ ಹೆಣೆದು ಸೇರಿಸಿದ್ದು ಅಮ್ಮುವಿನ ಚಿತ್ರ ಹಳೆಯದು ಆದರೆ ಹಳೆ ಚಿತ್ರಗಳು ಪ್ರತಿ ಬಾರಿಯೂ ತರುವ ಸವಿಗೆ ಹಳೆತನವೇನೂ ಇಲ್ಲವಲ್ಲ!

Thursday, August 7, 2008

ನಮ್ಮ ಬೆಸ್ತರ ಹುಡುಗಿ!

ನಮ್ಮ ಬೆಸ್ತರ ಹುಡುಗಿಯ ವಿವಿಧ ಭಾವ ಭಂಗಿಗಳು...ನಮ್ಮ ಹುಡುಗಿ ಬಲು ಚಂಚಲೆಯಾದ್ದರಿಂದ ಚಿತ್ರಗಳೂ ಸ್ವಲ್ಪ ಚಂಚಲವಾಗೇ ಕಂಡುಬರುತ್ತಿವೆ!












Friday, August 1, 2008

ಮೊಲದ ಮರಿ... ಮೊಲದ ಮರಿ...


ಮೊಲದ ಮರಿ ಮೊಲದ ಮರಿ
ಆಡು ಬಾರೇ..
ಚುಪುಕೆ ಚುಪುಕೆ ಚುಪುಕೆ ಚುಪುಕೆ
ನೆಗೆದು ಬಾರೆ

ದೊಡ್ಡದಾದ ಕಾಡಿನೊಳಗೆ
ಏನು ಮಾಡುವೆ
ಹೆಡ್ಡ ನೀನು ಪೊದರಿನೊಳಗೆ
ಏಕೆ ಅಡಗುವೆ?

ಪೊದರಿನಿಂದ ಪೊದರ ಬಳಿಗೆ
ನಿನ್ನ ಆಟ
ಗಿಡದ ಚಿಗುರು ನಿತ್ಯ ನಿನಗೆ
ಸೊಗಸಿನೂಟ

ಗಿಡ್ಡ ಬಾಲ ದೊಡ್ದ ಕಿವಿಯು
ನಿನಗೆ ಚೆಂದ
ಎದ್ದು ಎನ್ನ ಬಳಿಗೆ ಬಂದು
ಆಡೊ ಕಂದ

ಗೂಡು ಕಟ್ಟಿತಿಂಡಿ ಕೊಡುವೆ
ಪ್ರೀತಿಯಿಂದ
ಕಾಡಬಿಟ್ಟು ಊರ ಸೇರೋ
ಮೊಲದ ಕಂದಾ

ಮುದ್ದು ಮುದ್ದು ಮಾತುಗಳನು
ನಿನಗೆ ಕಲಿಸುವೇ
ಮುದ್ದು ಮಾಡಿ ಪ್ರೀತಿಯಿಂದ
ನಿನ್ನ ಸಲಹುವೇ
**********
ನನ್ನ ತಂಗಿ ಎರಡು ಜುಟ್ಟು ಕಟ್ಟಿಕೊಂಡು ಈ ಮೊಲದ ಹಾಡು ಹಾಡುತ್ತಾ ಜಿಗಿಯುತ್ತಾ ಡ್ಯಾನ್ಸ್ ಮಾಡುತ್ತಿದ್ದುದು ನನಗೆ ಇನ್ನೂ ಚೆನ್ನಾಗಿ ನೆನಪಿದೆ, ಇದು ನನಗೂ ಮೆಚ್ಚಿನ ಹಾಡಾಗಿತ್ತು...
*******
ಚಿತ್ರ ಕೃಪೆ-ಲೈವ್ ಸರ್ಚ್

Tuesday, July 29, 2008

ಮಾತಿನ ಮಲ್ಲ ಅಮ್ಮು....

ಅಮರ್ತ್ಯ ವಿಪರೀತ ಮಾತಾಡಲು ಶುರು ಮಾಡಿದ್ದಾನೆ ಅದಕ್ಕೇ ಈ ಹೊಸಾ ಫೀಚರ್
ಆಗಾಗ ಅವನು ಹೊಸ ಪದಗಳನ್ನು ವಟವಟಾಯಿಸಿದಾಗಲೆಲ್ಲಾ ಇಲ್ಲಿ ಅವುಗಳು ಕಾಣಿಸಿಕೊಳ್ಳುತ್ತವೆ
ಅವನು ಮಾತಾಡಿದ್ದಕ್ಕೆಲ್ಲಾ ಅರ್ಥ ಇರಲೇ ಬೇಕೆಂದು ನಿಯಮವೇನೂ ಇಲ್ಲವಷ್ಟೇ ಅಥ್ವಾ ಅವನ ಪ್ರತಿ ಪದಕ್ಕೂ ಖಂಡಿತಾ ಅರ್ಥವಿದ್ದೇ ಇರುತ್ತದೆ ಜಗತ್ತಿನ ಯಾವುದೋ ಭಾಷೆಯಲ್ಲಿ ಎಂಬ ನಂಬಿಕೆಯೊಂದಿಗೆ...


ಈಗೆರಡು ತಿಂಗಳ ಹಿಂದೆ ಒಂದು ವರ್ಷದವನಿದ್ದಾಗ ಅಮರ್ತ್ಯ ಪದೇ ಪದೇ ಹೇಳುತ್ತಿದ್ದದು ಬಾ... ಬಾ...ಬಕ್ಕ ಬಾ... ಅಂತ
ಬಾ ಮತ್ತು ಬಕ್ಕ ಗಳ ಎಲ್ಲಾ ಪರ್ಮುಟೇಶನ್ ಕಾಂಬಿನೇಶನ್ಗಳನ್ನು ಮಾಡಿ ಹೇಳುತ್ತಿದ್ದ
ಬಕ್ಕ... ಬಕ್ಕ... ಬಕ್ಕ...ಬಾ...
ಬಕ್ಕ... ಬಾ..ಬಾ ಮತ್ತು
ಬಕ್ಕ.. ಬಕ್ಕ ..ಬಾ.. ಬಾ.. ಬಾ..
ಬಕ್ಕ..ಬಕ್ಕ.. ಬಾಆಆಆಅ..ಇತ್ಯಾದಿ ಇತ್ಯಾದಿ

ಇಲ್ಲಾ,ಇಲಾ ,ಇಲ್ಯಾ.ಇಲ್ಲಲ್ಲ.ಇಲ್ಲಿಲ್ಲಾ ಇವು ತುಂಬಾ ಮೊದಲಿನಿಂದ ಇದ್ದವು
ಈಗ ಇವುಗಳ ಜೊತೆ ಹಕ್ಕ ಬುಕ್ಕರಂತೆ ಬಕ್ಕ ಮತ್ತು ಬಾ ಸೇರಿಕೊಂಡವು
ಈ ಇಲ್ಲ ಸರಣಿ ಮತ್ತು ಬಕ್ಕ ಬಾ ಗಳ ನಡುವಿನ ಅವಧಿಯಲ್ಲಿ ಅಮ್ಮ ಅಮ್ಮಿ ಶುರುವಾಗಿದ್ದು.
ಕೆಲವು ದಿನ ನನ್ನನ್ನು ಅಮ್ಮ ಅಂತ ಕರೆದು ನಂತರ ನಮ್ಮಿಬ್ಬರನ್ನೂ ಅಮ್ಮ ಅಂತ ಕರೆಯಲು ಶುರು ಮಾಡಿದ
ಒಂದೆರಡು ದಿನ ಬೇರೇನೋ ವಸ್ತು ಅಮ್ಮ ಆಗಿತ್ತು ಮತ್ತು ನಂತರ ಅಮ್ಮ ಮಾಯವಾಯಿತು
ಈಗ ಮತ್ತೆ ಅಮ್ಮ ಬಂದಿದೆ

ಅಫ್ ಕೋರ್ಸ್ ಜೊತೆಗೊಂದು ಬಾಲದೊಂದಿಗೆ "ಅಮ್ಮಮಮ್ಮಾ"ಅಂತ

ಈ ಬಾರಿ he is clear ನಾನು ಮಾತ್ರ ಅಮ್ಮಮಮ್ಮ!

ಅಪ್ಪ ಪಾಪ...ಸದ್ಯಕ್ಕೆ ಹೆಸರಿಲ್ಲದ ಪ್ರಾಣಿ!

ಕಾವೇರಿಯಲ್ಲೂ ಮರ್ಸೆಡ್ ನಲ್ಲೂ ಸಾಕಷ್ಟು ನೀರು ಹರಿದಿದೆಯಲ್ಲಾ..
ಹಾಗೇ ಅಮರ್ತ್ಯನ ಅರ್ಥವಿಲ್ಲದ ಮಾತಿನ ಸರಣಿಯೂ ಹರಿದಿದೆ
ಸುಸಂಬದ್ದವಲ್ಲದ ಅಕ್ಷರ ಸರಣಿಯನ್ನು ನೆನಪಲ್ಲಿ ಇಟ್ಟುಕೊಳ್ಳುವುದು ಕಷ್ಟ

ಕಾ...ಕಯಮ್..ಜಮ್..ಜುಮ್...ಗಂ..ಕಿಕ್ಕ..ಪಿಪ್ಯಾ...ಪಿಕೋ..
ಹೀಗೆಲ್ಲಾ ಇಡೀ ದಿನ ವಾರ್ತಾಲಾಪ ನಡೆಯುತ್ತಿರುತ್ತದೆ ಕೆಲವೊಮ್ಮೆ ಮಧ್ಯರಾತ್ರಿ ನಡು ಹಾಸಿಗೆಯಲ್ಲಿ ಎದ್ದು ಕುಳಿತು ಸಂಗೀತ ಕಛೇರಿ ಶುರು ಮಾಡಿ ಬಿಡುತ್ತಾನೆ



ಈಗೆರಡು ದಿನದಿಂದ ಬೀ ಮತ್ತು ಬೇ ಶುರುವಾಗಿದೆ
ಎರಡು ಯಾವಾಗಲೂ ಜೊತೆ ಜೊತೆಗೇ ಬಾಯಿಂದ ಹೊರಬರುತ್ತವೆ
ಕೆಲವು ಉದಾಹರಣೆಗಳು ಹೀಗೆ....


ಬೀಬಿ-ಯಾವ ಬೀಬಿಯೋ ಇವಳು .. ಚಾಂದ್ ಬೀಬಿ ಇರಬಹುದಾ?

ಬೇ ಬೇ- ನಾನು ಚಿಕ್ಕವಳಿದ್ದಾಗ 'ಬೇಡ' ಎನ್ನಲು ಬೇ ಬೇ ಅನ್ನುತ್ತಿದ್ದೆನಂತೆ ಹಾಗಂತ ಅಮ್ಮ ಹೇಳ್ತಾರೆ ನನ್ನ ಮಗನಿಗೂ ರಕ್ತದಲ್ಲೇ ಇದು ಬಂದಿರಬಹುದಾ!!!

ಬೇಬಿ-ಇದು ಬೊಂಬಾಟ್ ನೆನ್ನೆ ವಾಕಿಂಗ್ ಕರೆದು ಕೊಂಡು ಹೋದಾಗ ಸುಮಾರು ತನ್ನಷ್ಟೇ ವಯಸ್ಸಿನ ಮಗುವನ್ನು ಅಮ್ಮು 'ಬೇಬಿ...'ಅಂತ ಕರೆದು ನಿಂತಲ್ಲೇ ನಿಂತು ಬಿಟ್ಟಆ ಬೇಬಿಯ ಚೀನೀ ಅಪ್ಪ ಅಮ್ಮನಿಗೆ ಖುಷಿಯೋ ಖುಷಿ.ನಾನು ಮೊದಲು ನಿಮ್ಮ ಮಗುವನ್ನಲ್ಲಾ ಅವನು ಬೇಬಿ ಅಂದಿದ್ದು ಅಂತ ಆ ಚೀನಿ ದಂಪತಿಗಳಿಗೆ ಸಮಜಾಯಿಸಲು ಪ್ರಯತ್ನಿಸಿದೆನಾದರೂ ಅವರು ನನ್ನ ಮಾತು ಕೇಳಲೇ ತಯಾರಿರಲ್ಲಿಲ್ಲ ಇವನು ತನ್ನೆಲ್ಲಾ ಅಸಂಬದ್ಧ ಪ್ರಲಾಪಗಳ ನಡುವೆ ಇನ್ನೊಮ್ಮೆ ಬೇಬಿ ಅನ್ನುತ್ತಾನೇನೋ ಅಂತ ಕಾದುಕೊಂಡು ಇವನನ್ನು ಮಾತಾಡಲು ಪ್ರೋತ್ಸಾಹಿಸುತ್ತಿದ್ದರು ಇವನೂ ಸಿಕ್ಕಿದ್ದೇ ಚಾನ್ಸು ಅಂತ ಬಾಯಿಗೆ ಬಂದಿದ್ದನ್ನೆಲ್ಲಾ ವದರುತ್ತಿದ್ದ ಎರಡೂ ಪಾರ್ಟಿಯವರೂ ಸಂತೋಷವಾಗಿರುವಾಗ ನನ್ನದೇನು ಕಿತಾಪತಿ ಅಂತ ಕೊನೆಗೆ ನಾನು ಸುಮ್ಮನಾಗಿ ಬಿಟ್ಟೆ