Showing posts with label ಮಕ್ಕಳ ಹಾಡುಗಳು. Show all posts
Showing posts with label ಮಕ್ಕಳ ಹಾಡುಗಳು. Show all posts

Thursday, October 16, 2008

ಚಂದುಮಾಮ ಬಾ...

ಬಾ ಬಾ ಚಂದು ಮಾಮ
ಮುತ್ತು ಕೊಡು ಬಾ


ಕಬ್ಬು ಹೆಚ್ಚಿ ತಿರುಳೇ ಕೊಡುವೆ
ಮಾವು ಹೆಚ್ಚಿ ವಾಟೀ ಕೊಡುವೆ
ಬಾಬಾ ಚಂದು ಮಾಮ
ತಿಂಡಿ ತಿನ್ನು ಬಾ


ಕೌಲಿ ಹಾಲು ಕರೆಯಿಸಿ ಕೊಡುವೆ
ಹಾಲು ಕುಡಿಯಲು ಬಟ್ಟಲು ಕೊಡುವೆ
ಬಾ ಬಾ ಚಂದು ಮಾಮ
ಹಾಲು ಕುಡಿ ಬಾ


ತುಪ್ಪದ ದೀಪ ಹಚ್ಚಿ ಇಡುವೆ
ಪುಟ್ಟ ಪುಸ್ತಕ ಓದಲು ಕೊಡುವೆ
ಬಾ ಬಾ ಚಂದು ಮಾಮ
ಪಾಠ ಓದು ಬಾ


ಆಟದ ಸಾಮಾನೆಲ್ಲಾ ಕೊಡುವೆ
ನಿನ್ನ ಸಂಗಡ ಆಡುತಲಿರುವೆ
ಬಾಬಾ ಚಂದು ಮಾಮ ಬಾ
ಕೂಡಿ ಆಡು ಬಾ

-ಹೊಯಿಸಳ

Tuesday, October 7, 2008

ಕಂದ ರಂಗಯ್ಯ...

ಅಂಗಳದ ತುಂಬೆಲ್ಲಾ ರಂಗೋಲಿ ಬಿಡಿಸಿದ್ದೆ
ಕಂದ ರಂಗಯ್ಯ ಒಳಹೊರಗ ಓಡಾಡಿ
ಮನೆಯ ಒಳಗೆಲ್ಲಾ ಚಿತ್ತಾರಾ...


ದಿಡ್ಡಿ ಬಾಗಿಲಿಗೆ ಮುತ್ತಿನ ತೋರಣ ಕಟ್ಟಿದ್ದೆ
ಕಂದ ರಂಗಯ್ಯ ಒಳಹೊರಗ ನಲಿದಾಡಿ
ಮನೆಯ ಒಳಗೆಲ್ಲಾ ಮುತ್ತಿನ ಸಿಂಗಾರಾ...


ಹಿತ್ತಲ ತುಂಬೆಲ್ಲಾ ಮಲ್ಲಿಗೆ ಸೇವಂತಿ ಬೆಳೆದಿದ್ದೆ
ಕಂದ ರಂಗಯ್ಯ ಒಳಹೊರಗ ನೆಗೆದಾಡಿ
ಮನೆಯ ಒಳಗೆಲ್ಲಾ ಹೂಬನಾ...

_ಅಮ್ಮುವಿನಮ್ಮ

Saturday, September 20, 2008

ಲಾಲೀ ಮುದ್ದು ಲಾಲೀ ,ಚಿನ್ನ ಲಾಲೀ...


ಲಾಲೀ ಮುದ್ದು ಲಾಲೀ ,ಚಿನ್ನ ಲಾಲೀ

ತೊಟ್ಟಲಿನೊಳಗೆ ಪುಟ್ಟ ಕಂದ ಮಲಗಿಹನು
ಸೃಷ್ಟಿಗೊಡೆಯನ ಮಡದಿಯ,ಪಾರ್ವತಿ ದೇವಿ
ದೃಷ್ಟಿ ತಗುಲೀತು ತೆರೆ ಹಾಕ...

ಲಾಲೀ ಮುದ್ದು ಲಾಲೀ ,ಚಿನ್ನ ಲಾಲೀ

ಅಳಬೇಡ ನನ ಕಂದ ನಿನಗೆ ಜೋಗುಳ ಹಾಡಿ
ಹುಣ್ಣಿಮೆ ಹಾಲು ತಂದು ಉಣಿಸೇನ,ಮಾವನ ಮಗಳ
ಕರ ತಂದು ಧಾರೆ ಎರೆದೇನ....

ಲಾಲೀ ಮುದ್ದು ಲಾಲೀ ,ಚಿನ್ನ ಲಾಲೀ


ನನ್ನಯ್ಯನಂತೋರು ಹನ್ನೆರಡು ಮಕ್ಕಳು
ಹೊನ್ನೆಯ ಮರದ ನೆರಳಾಗ ಆಡುವಾಗ
ಸನ್ಯಾಸಿ ಜಪವಾ ಮರೆತಾನೂ...

ಲಾಲೀ ಮುದ್ದು ಲಾಲೀ ,ಚಿನ್ನ ಲಾಲೀ

Saturday, September 13, 2008

ಚಿಂವ್ ಚಿಂವ್ ಗುಬ್ಬಿ...


ಗುಬ್ಬಿ ಗುಬ್ಬಿ
ಚಿಂವ್ ಚಿಂವ್
ಎಂದು ಕರೆಯುವೆ ಯಾರನ್ನು?

ಆಚೆ ಈಚೆ
ಹೊರಳಿಸಿ ಕಣ್ಣು
ನೋಡುವೆ ಏನನ್ನು?

ಮೇಲೆ ಕೆಳಗೆ
ಕೊಂಕಿಸಿ ಕೊರಳನು
ಹುಡುಕುವೆ ಏನಲ್ಲಿ?

ಕಾಳನು ಹುಡುಕುತ
ನೀರನು ನೋಡುತ
ಅಲೆಯುವೆ ಏಕಿಲ್ಲಿ?

ಕಾಳನು ಕೊಟ್ಟು
ನೀರನು ಕುಡಿಸುವೆ
ಆಡಲು ಬಾ ಇಲ್ಲಿ

ಹಣ್ಣನು ಕೊಟ್ಟು
ಹಾಲನು ನೀಡುವೆ
ನಲಿಯಲು ಬಾ ಇಲ್ಲಿ

-ಎ.ಕೆ.ರಾಮೇಶ್ವರ

Monday, August 11, 2008

ತಟ್ಟಿ ತಟ್ಟೀ ರಂಗಯ್ಯ

ತಟ್ಟೀ ತಟ್ಟಿ ರಂಗಯ್ಯಾ
ಕಾಳಿ ಮುದ್ದು ರಂಗಯ್ಯ
ಬಾಯಿಗೆ ಬೆಣ್ಣೆ ಇಡಿಸಯ್ಯ
ಕಣ್ಣಿಗೆ ನಿದ್ದೆ ಬರಿಸಯ್ಯ
ತಟ್ಟೀ ತಟ್ಟಿ ರಂಗಯ್ಯಾ

ತಟ್ಟೀ ತಟ್ಟಿ ರಂಗಯ್ಯಾ
ರನ್ನದಗುಂಡು ರಂಗಯ್ಯ
ಚಿನ್ನದ ತಟ್ಟೆ ತರಿಸಯ್ಯ
ತುಪ್ಪ ಅನ್ನ ಉಣಿಸಯ್ಯ
ಕಣ್ಣಿಗೆ ನಿದ್ದೆ ಬರಿಸಯ್ಯ
ತಟ್ಟೀ ತಟ್ಟಿ ರಂಗಯ್ಯಾ

ತಟ್ಟೀ ತಟ್ಟಿ ರಂಗಯ್ಯಾ
ಬೆಳ್ಳಿ ಕಡಗದ ರಂಗಯ್ಯ
ಪಚ್ಚೆ ಬಟ್ಟಲ ತರಿಸಯ್ಯ
ಸಕ್ಕರೆ ಸಜ್ಜಿಗೆ ಉಣಿಸಯ್ಯ
ಕಣ್ಣಿಗೆ ನಿದ್ದೆ ಬರಿಸಯ್ಯ
ತಟ್ಟೀ ತಟ್ಟಿ ರಂಗಯ್ಯಾ

ತಟ್ಟೀ ತಟ್ಟಿ ರಂಗಯ್ಯಾ
ಮುತ್ತಿನಪದಕ ರಂಗಯ್ಯ
ಬೆಳ್ಳಿಲೋಟವ ತರಿಸಯ್ಯ
ಕೇಸರಿ ಹಾಲು ಕುಡಿಸಯ್ಯ
ಕಣ್ಣಿಗೆ ನಿದ್ದೆ ಬರಿಸಯ್ಯ
ತಟ್ಟೀ ತಟ್ಟಿ ರಂಗಯ್ಯಾ

ಇಂಡಿಯಾಗೆ ಹೋದಾಗ ಈಹಾಡಿನ ಮೊದಲ ನುಡಿ ಕೇಳಿದ್ದು ಅಮ್ಮುವಿನ ಅಜ್ಜಿ ಬಾಯಲ್ಲಿ. ಮಿಕ್ಕ ನುಡಿಗಳನ್ನು ನಾನೇ ಹೆಣೆದು ಸೇರಿಸಿದ್ದು ಅಮ್ಮುವಿನ ಚಿತ್ರ ಹಳೆಯದು ಆದರೆ ಹಳೆ ಚಿತ್ರಗಳು ಪ್ರತಿ ಬಾರಿಯೂ ತರುವ ಸವಿಗೆ ಹಳೆತನವೇನೂ ಇಲ್ಲವಲ್ಲ!

Friday, August 1, 2008

ಮೊಲದ ಮರಿ... ಮೊಲದ ಮರಿ...


ಮೊಲದ ಮರಿ ಮೊಲದ ಮರಿ
ಆಡು ಬಾರೇ..
ಚುಪುಕೆ ಚುಪುಕೆ ಚುಪುಕೆ ಚುಪುಕೆ
ನೆಗೆದು ಬಾರೆ

ದೊಡ್ಡದಾದ ಕಾಡಿನೊಳಗೆ
ಏನು ಮಾಡುವೆ
ಹೆಡ್ಡ ನೀನು ಪೊದರಿನೊಳಗೆ
ಏಕೆ ಅಡಗುವೆ?

ಪೊದರಿನಿಂದ ಪೊದರ ಬಳಿಗೆ
ನಿನ್ನ ಆಟ
ಗಿಡದ ಚಿಗುರು ನಿತ್ಯ ನಿನಗೆ
ಸೊಗಸಿನೂಟ

ಗಿಡ್ಡ ಬಾಲ ದೊಡ್ದ ಕಿವಿಯು
ನಿನಗೆ ಚೆಂದ
ಎದ್ದು ಎನ್ನ ಬಳಿಗೆ ಬಂದು
ಆಡೊ ಕಂದ

ಗೂಡು ಕಟ್ಟಿತಿಂಡಿ ಕೊಡುವೆ
ಪ್ರೀತಿಯಿಂದ
ಕಾಡಬಿಟ್ಟು ಊರ ಸೇರೋ
ಮೊಲದ ಕಂದಾ

ಮುದ್ದು ಮುದ್ದು ಮಾತುಗಳನು
ನಿನಗೆ ಕಲಿಸುವೇ
ಮುದ್ದು ಮಾಡಿ ಪ್ರೀತಿಯಿಂದ
ನಿನ್ನ ಸಲಹುವೇ
**********
ನನ್ನ ತಂಗಿ ಎರಡು ಜುಟ್ಟು ಕಟ್ಟಿಕೊಂಡು ಈ ಮೊಲದ ಹಾಡು ಹಾಡುತ್ತಾ ಜಿಗಿಯುತ್ತಾ ಡ್ಯಾನ್ಸ್ ಮಾಡುತ್ತಿದ್ದುದು ನನಗೆ ಇನ್ನೂ ಚೆನ್ನಾಗಿ ನೆನಪಿದೆ, ಇದು ನನಗೂ ಮೆಚ್ಚಿನ ಹಾಡಾಗಿತ್ತು...
*******
ಚಿತ್ರ ಕೃಪೆ-ಲೈವ್ ಸರ್ಚ್

Friday, June 13, 2008

ಪೋಕರಿ ಕಿಟ್ಟನಿಗೆ ಮೀರ ಆಂಟಿಯ ಸಪೋರ್ಟು!


ಪೋಗುತಾಲಿರೊ ಕಿಟ್ಟ,
ನಿನ್ನಮ್ಮ ಎಷ್ಟು ತಡೆದರೂ....
ಡೈಪರ್ರು ಕಿತ್ತೆಸೆದು
ಸ್ಮೈಲ್ ಒಂದು ತೆಗೆದೆಸೆದು
ಪೋಗಾತಾಲಿರೋ ಪುಟ್ಟ......
ನಂದಗೋಕುಲದೊಳಗೆ ಬಂದ
ನಮಗೆಲ್ಲರಿಗು ಚಂದದಿಂದಲಿ
ಒಂದುಹೂನಗೆಯನೆಸೆಯುತ್ತ
ನಲಿಯುತಾಲಿರೋ ಕಿಟ್ಟ.......
ಅಂಕಲ್, ಆಂಟಿಗಳೆಲ್ಲ
ಬಿಂಕದಲಿ ಕುಳಿತಿರಲು
ಅಂಕೆಯಿಲ್ಲದೆ ಅವರು
ಬಾಯ್ಬಿಟ್ಟು ನಗುವಂತೆ
ಮಾಡೂತಲಿರೋ ಕಿಟ್ಟ......

Monday, April 7, 2008

ಕಿಟ್ಟಣ್ಣ ನ ಹೊಸ ಯುಗಾದಿ ಹಾಡು


ಯುಗಾದಿ ಹಬ್ಬ ಬಂತಣ್ಣ


ಹೋಳಿಗೆ ತುಪ್ಪ ಹೊಡೆಯೋಣಾ


ಲಕ ಲಕ ಲಕ ಲಕ....




ಬೇಲದ ಪಾನಕ ಕುಡಿಯೋಣ


ಮಾವಿನ ಮಿಡಿಗಳ ಮೆಲ್ಲೋಣ


ಮಿ ಮಿಮ್ ಮಿ ಮಿಮ್.....



ಜುಮ್ಮನೆ ಜೋಕಾಲಿ ಜೀಕೋಣಾ


ಬಿದಿಗೆ ಚಂದಿರ ನೋಡೋಣಾ


ನಾ ನಿನ್ ನಾ ನಿನ್......



ಕಿಟ್ಟಣ್ಣ ನ ಅಮ್ಮನ ಟಿಪ್ಪಣಿ-ಪ್ರತಿ ನುಡಿಯ ಕೊನೆಯ ಸಾಲು ಅಮ್ಮು ಆಲಿಯಾಸ್ ಕಿಟ್ಟಣ್ಣನ ಇತ್ತೀಚಿನ ತೊದಲು ನುಡಿಗಳು...!


ಮಿಕ್ಕಿದ್ದು ನಾನು ಸೇರಿಸಿದ್ದು


Thursday, April 3, 2008

ನನ್ನ ಕೃಷ್ಣ


ಅಳಬೇಡೋ ನನ್ನ ಕೃಷ್ಣ
ಹಾಲು ಮಾರಿ ಬರ್ತೀನಿ
ಕಾಲಿಗೆ ಕಡಗ ತರ್ತೀನಿ
ಮೊಸರು ಮಾರಿ ಬರ್ತೀನಿ
ಹಸಿರು ಅಂಗಿ ತರ್ತೀನಿ
ಬೆಣ್ಣೆ ಮಾರಿ ಬರ್ತೀನಿ
ಬಣ್ಣದ ಗಿಲಕಿ ತರ್ತೀನಿ
ತುಪ್ಪ ಮಾರಿ ಬರ್ತೀನಿ
ಒಪ್ಪಿದ ಹುಡುಗಿ ತರ್ತೀನಿ
ಅಳಬೇಡೋ ನನ್ನ ಕೃಷ್ಣ

Friday, March 28, 2008

ಮಲ್ಲಕ್ಕನ ಕಥೆ..!

ಶಾಲೆಗೆ ಹೋಗೇ ಮಲ್ಲಕ್ಕ
ಪಾಟಿ ಪುಸ್ತಕ ಇಲ್ಲಕ್ಕ
ಕಸೂತಿ ತೆಗೆಯೇ ಮಲ್ಲಕ್ಕ
ಸೂಜಿ ದಾರ ಇಲ್ಲಕ್ಕ
ಮುಸುರೆ ತೊಳೆಯೇ ಮಲ್ಲಕ್ಕ
ಮೈ ಕೈ ಎಲ್ಲಾ ನೋವಕ್ಕಾ
ನೀರು ಸೇದೇ ಮಲ್ಲಕ್ಕ
ಸೇದೋ ಹಗ್ಗ ಇಲ್ಲಕ್ಕ
ಊಟಕೆ ಬಾರೇ ಮಲ್ಲಕ್ಕ
ಬಂದೆನು ಬೇಗ ಬಡಿಸಕ್ಕ
***********************
ಅಮ್ಮುವಿನಮ್ಮನ ಟಿಪ್ಪಣಿ-
ಈ ಮಲ್ಲಕ್ಕ ಯಾರು ಅಂತ ಗೊತ್ತಾಯ್ತಲ್ಲಾ...!
ನಾವೆಲ್ಲಾ ಚಿಕ್ಕವರಿದ್ದಾಗ ಇದನ್ನೇ ಹೋಲುವ 'ತೋಟಕೆ ಹೋಗೋ ತಿಮ್ಮ'
ಹಾಡುತ್ತಿದ್ದೆವು ಮಲ್ಲಕ್ಕನ ಹಾಡು ಮತ್ತು ಇತರ ಹಲವು ಮಕ್ಕಳ ಹಾಡುಗಳನ್ನು ನನಗೆ ತಮ್ಮ ಸಂಗ್ರಹದಿಂದ ಕೊಟ್ಟವರು ನಮ್ಮ ನಂಜಮ್ಮ ಟೀಚರ್ ಅವರಿಗೆ ಧನ್ಯವಾದಗಳು

Thursday, January 24, 2008

ಪುಟ್ಟ ಹಕ್ಕಿ, ಬಾ...


ಪುಟ್ಟ ಹಕ್ಕಿ, ಬಾ...
ಪುಟ್ಟ ಹಕ್ಕಿ, ಪುಟ್ಟ ಹಕ್ಕಿ, ಎತ್ತ ಹಾರುತಿರುವೆ?
ಅತ್ತ ಇತ್ತ ನೋಡಿಕೊಂಡು, ಮತ್ತೆ ಓಡುತಿರುವೆ?
ಗಾಳಿ ಬೀಸಿ, ಧೂಳು ಹಾಸಿ, ಕೆಮ್ಮುತಿರುವೆ, ಬಾ
ಸಿಹಿಯ ನೀರ ಬೊಗಸೆಯಲ್ಲಿ ಹಿಡಿವೆ ನಿನಗೆ, ಬಾ
ಮಳೆಯು ಬಂತು, ಛಳಿಯು ಉಂಟು, ನನ್ನ ಜೊತೆಗೆ ಬಾ
ಅಮ್ಮ ಹೊಲಿದ ಗಾದಿಯೊಳಗೆ ಬೆಚ್ಚಗಿಡುವೆ, ಬಾ
ಕಾಳು ಸಿಗದೆ, ಶಕ್ತಿ ಇರದೆ, ಬಿಕ್ಕುತಿರುವೆ, ಬಾ
ಅಪ್ಪ ತಂದ ತಿಂಡಿಯನ್ನು ಹಂಚಿ ಕೊಡುವೆ, ಬಾ
ಕತ್ತಲಾಯ್ತು, ದೀಪ ಹೋಯ್ತು, ಇಲ್ಲೆ ನಿಲ್ಲು, ಬಾ
ಅಣ್ಣ ಕೊಟ್ಟ ಗರಿಯ ಮರಿಯ ನಿನಗೆ ಮುಡಿವೆ, ಬಾ
ಬೆಳಗು ಬರಲಿ, ರವಿಯು ನಗಲಿ, ಹೊರಗೆ ಲೋಕದಲ್ಲಿ
ಅಲ್ಲಿತನಕ ಜೊತೆಯಲಿರುವ, ನನ್ನ ಕೋಣೆಯಲ್ಲಿ.
-ಸುಪ್ತದೀಪ್ತಿ
*************
ನಂದಗೋಕುಲದ ಮತ್ತು ಅಮ್ಮುವಿನ ಮೇಲಿನ ಅಕ್ಕರೆಯಿಂದ ಕವನ ಬರೆದುಕೊಟ್ಟ ಸುಪ್ತದೀಪ್ತಿಯವರಿಗೂ, ಚಿತ್ರ ಬಿಡಿಸಿಕೊಟ್ಟ ನಿತೀಶ್ ಗೂ ಅಮ್ಮುವಿನಮ್ಮನ ಥ್ಯಾಂಕ್ಸ್

Wednesday, January 16, 2008

ಸಂಕ್ರಾಂತಿ ಸಂಭ್ರಮ


ಅಮರ್ತ್ಯನಿಗೆ ಎಳ್ಳು ಎರೆದ ಹಾಡು
ಮುತ್ತಿನ ಹಸೆ ಬರೆದು ರತ್ನದ ಮಣೆ ಹಾಕಿ
ರೇಶ್ಮೆ ಸೀರೆಯುಟ್ಟ ನೀರೆಯರು
ಹಸೆಗೆ ಬಾ ಅಮರ್ತ್ಯ ಕುಮಾರ
ಎಂದು ಕರೆದರು...
ಮುದ್ದು ಮುಖದ ತುಂಬ ಮಲ್ಲಿಗೆಗೆ ನಗು ಚೆಲ್ಲುತ್ತ
ಮೆಲ್ಲ ಮೆಲ್ಲನೆ ಅಂಬೆಗಾಲಿಡುತ
ಅಮರ್ತ್ಯ ಕುಮಾರನು ಬಿಂಕದಿ
ಹಸೆಗೆ ಬಂದನು...
ಅಂದದ ಹಸೆಯಲ್ಲಿ ಅಮರ್ತ್ಯನ ಕುಳ್ಳಿರಿಸಿ
ಅಲ್ಲಿ ನೆರೆದ ಲಲಿತಾಂಗಿಯರೆಲ್ಲ
ಬೆಳ್ಳಿಯ ಬಟ್ಟಲಲಿ ಎಳ್ಳು ಎರೆದರು
ಚೆಂದದಿ ನಗುನಗುತಲೀ....
ಎಳ್ಳು ಬೆಲ್ಲ ಕೊಬ್ಬರಿಯ ಎರೆದರು
ಎಲಚಿ ಹಣ್ಣು ಒಣದ್ರಾಕ್ಷಿ ಬಾದಾಮಿಗಳನೆರೆದರು
ಸಾಲದೆಂದು ಮುತ್ತಿನ ಮಣಿಗಳ
ಮತ್ತೆ ಸುವರ್ಣ ಪುಷ್ಪಗಳನೆರೆದರು...
ನಗುನಗುತ ಬಾಳಪ್ಪ ಅಮರ್ತ್ಯ ಕುಮಾರ
ಸಮವಾದ ದೃಷ್ಟಿ ಹಿರಿದಾದ ಮನಸು
ಆರೋಗ್ಯ ಸೌಖ್ಯ ಸುಖಗಳು ನಿನಗೊದಗಲೀ
ಜಯಮಂಗಳ ನಿತ್ಯ ಶುಭ ಮಂಗಳ...

ಟಿಪ್ಪಣಿ- ನಿನ್ನೆ ಅಮರ್ತ್ಯನಿಗೆ ಎಳ್ಳು ಎರೆದದ್ದು ಜೀನ್ಸ್ ಧಾರಿ ನಾನೊಬ್ಬಳೇ.. ಎಳ್ಳು ಎರೆಯುವ ಯಾವ ಹಾಡೂ ನನಗೆ ಬಾರದ್ದರಿಂದ ಬಾಯಿ ಹೊಲೆದು ಕೊಂಡಂತೆ ಎಳ್ಳೆರೆದು ಮುಗಿಸಿದಾಗ ನನಗೆ ಪಿಚ್ಚೆನ್ನಿಸಿತು ಪರಿಣಾಮ -ಈಗಷ್ಟೇ ಬರೆದ ಈ ಹಾಡು ಮುಂದಿನ ವರ್ಷ ಬಳಸಲಡ್ಡಿಯಿಲ್ಲ ನಿಮ್ಮ ಮನೆಯ ಮಗುವಿನ ಹೆಸರೊಂದಿಗೆ ನೀವೂ ಈ ಹಾಡು ಬಳಸಿ ಎಳ್ಳು ಎರೆಯಬಹುದು...

Sunday, December 30, 2007

ಆಡಿ ಬಾ ಕಂದಯ್ಯ...


ಆಡಿ ಬಾ ಕಂದಯ್ಯ ಅಂಗಾಲ ತೊಳೆದೇನು
ತೆಂಗಿನ ಕಾಯಿ ಎಳನೀರ ತಕ್ಕೊಂಡು
ಬಂಗಾರದಾ ಪಾದ ತೊಳೆದೇನು

ಹವ್ವಲ್ಲೆ ಹಸಿ ಮುದ್ದು ಹಣ್ಣು ತಾವರೆ ಮುದ್ದು
ಹಣ್ಣುಳ್ಳ ಮರಕೇ ಗಿಣಿ ಮುದ್ದೂ
ಕಂದಯ್ಯ ನಮ್ಮ ಮನೆಗೇ ನೀ ಮುದ್ದೂ

(ಧನ್ಯವಾದಗಳು-ಈ ಜನಪದ ಸಾಹಿತ್ಯವನ್ನು ಅಮ್ಮುವಿಗಾಗಿ ನೆನಪಿಸಿಕೊಂಡು ಹೇಳಿದವರು- ನನ್ನ ಅತ್ತೆ ಶ್ರೀಮತಿ ಸ್ವರ್ಣಾಂಬ ಶಂಕರ ನಾರಾಯಣ.)

Tuesday, December 4, 2007

ದೂರೀ....ದೂರೀ...




ದೂರಿ ದೂರಿ ದುಗ್ಗಾಲಮ್ಮ...
ನಾರಿ ಕೇಳೇ ನಂದಗೋಪೀ...

ಪುಟ್ಟ ಮುದ್ದೂ...
ಬೆಣ್ಣೆ ಕದ್ದೂ...
ಓಡಿ ಬಾರೋ...
ನನ್ನ ಚಿನ್ನಾ...


ಬೆಳ್ಳಿ ಬಟ್ಲು
ಸಕ್ರೆ ತೊಟ್ಲು
ಬಂಗಾರದ್ ಮೆಟ್ಲು
ಹತ್ತಿ ಬಾರೋ...

ಬೆಣ್ಣೆ ಕಳ್ಳಾ..
ಪುಟ್ಟ ಕುಳ್ಳಾ..
ಪಾಚಿ ಕೊಳ್ಳೋ..
ನನ್ನ ರನ್ನಾ...

ಚಂದಮಾಮಾ...
ಚಿನ್ನದ್ ಮಾಮಾ...
ತಾಚಿ ಕೊಳ್ಳೋ...
ನನ್ನ ಚಿನ್ನಾ...


ಟಿಪ್ಪಣಿ-ದೂರೀ...ದೂರೀ....ಎಂಬ ಈ ಜೋಗುಳದ ಮೊದಲೆರಡು ಸಾಲುಗಳು ಮಾತ್ರ ನನಗೆ ಗೊತ್ತಿದ್ದದು ಪೂರ್ಣಪಠ್ಯಕ್ಕಾಗಿ ತುಂಬಾ ಹುಡುಕಿದರೂ ನನಗೆ ಸಿಗಲಿಲ್ಲ. ಕೊನೆಗೊಂದು ದಿನ ಅಮರ್ತ್ಯನಿಗೆ ಚುಕ್ಕು ತಟ್ಟುತ್ತಾ ನನಗೆ ತೋಚಿದಂತೆ ಉಳಿದ ಸಾಲುಗಳನ್ನು ಹೆಣೆದು ಕೊಂಡೆ ಈ ಹಾಡು ಅಮ್ಮುವಿಗೆ ತುಂಬಾ ಇಷ್ಟ ನಿಮ್ಮಲ್ಲಿ ಯಾರಿಗಾದರೂ ಒರಿಜಿನಲ್ ಹಾಡು ಗೊತ್ತಿದ್ದರೆ ದಯವಿಟ್ಟು ಇಲ್ಲಿ ಹಂಚಿ ಕೊಳ್ಳಿ

Thursday, November 8, 2007

ಅಮ್ಮು ಮತ್ತು ನಕ್ಷತ್ರ


ಕಪ್ಪು ಕಪ್ಪು ಬಾನಲ್ಲಿ
ಮಿಣಿ ಮಿಣಿ ಮಿನುಗೋ ನಕ್ಷತ್ರ
ದೂರ ಯಾಕೆ ನಿಂತ್ ಬುಟ್ಟೇ
ಬೇಗ್ ಬೇಗ್ ಬಾ ನನ್ ಹತ್ರ

ನನ್ ಪುಟ್ ಪುಟ್ ಕಣ್ಗೆ ನೀನಂತೂ
ಎಷ್ಟು ಪುಟ್ ದಾಗಿ ಕಾಣ್ತೀಯಾ
ಹಾಗೇ ನಿನ್ ಪುಟ್ ಪುಟ್ ಕಣ್ಗೆ
ನಾನೂನೂ ಅಷ್ಟೇ ಪುಟ್ ದಾಗಿ ಕಾಣ್ತೀನಾ?

ಯಾರಪ್ಪಾ ಇದು ಹಾಸ್ಗೇಲ್
ಮಲ್ಕೊಂಡು,ಹೊದ್ಗೆ ಹೊದ್ಕೊಂಡು
ನನ್ ಹತ್ರ ಮಾತಾಡೋದು
ಅಂತ ಕೇಳ್ತೀಯಾ?

ನಿಂಗೂ ನನ್ ಹಾಸ್ಗೇಲೆ
ನನ್ನ ಅಮ್ಮನ್ ಪಕ್ಕ
ಬೆಚ್ಚನೆ ಜಾಗ ಕೊಡ್ತೀನಿ
ಹೇಳೂ ಕೆಳಗಿಳ್ದು ಬರ್ತೀಯಾ?

ಎಷ್ಟು ಕರುದ್ರೂ ನೀ ಬರ್ಲಿಲ್ವಲ್ಲಾ
ನಿಂಗ್ ನಿದ್ದೆ ಬರ್ತಿಲ್ವಾ?
ರಾತ್ರಿ ಪೂರಾ ಮಿಣ ಮಿಣ ಮಿನುಗಿ
ಹಗಲಲ್ ನಿದ್ದೇ ಮಾಡ್ತೀಯಾ?

ಓಕೇ ಗುಡ್ ನೈಟ್ ನಕ್ಷತ್ರ
ಮತ್ತೆ ನಾಳೆ ಸಿಗೋಣಾ
ಪ್ಲೀಸ್ ನಿದ್ದೆ ಮಾಡೋಕ್ ಟ್ರೈ ಮಾಡು
ಇಬ್ರೂ ಬೆಳಗ್ಗೆ ಆಡೋಣಾ

-ಮಾಲಾರಾವ್

Wednesday, November 7, 2007

ಮುದ್ದು ಮುದ್ದು


ಕಪ್ಪು ಕಪ್ಪು
ಸಾದು ಕಪ್ಪು
ನನ್ನ ಚಿನ್ನಿ
ಕೂದ್ಲು ಕಪ್ಪು


ಹಣೆ ಹಣೆ
ಬಂಗಾರ್ ದ್ ಮಣೆ
ಚುಕ್ಕಿ ಇಟ್ಟ
ಪುಟ್ಟ ಹಣೆ


ಹಣ್ಣು ಹಣ್ಣು
ನೇರ್ಳೆ ಹಣ್ಣು
ನನ್ನ ಪುಟ್ಟ
ನಿನ್ನ ಕಣ್ನು


ಚೆಂದ ಚೆಂದ
ಏನು ಚೆಂದ?
ನಮ್ಮ ಗಿಳಿಯ ಮೂಗೇ ಚೆಂದ

ಮುದ್ದೆ ಮುದ್ದೆ
ಬೆಣ್ಣೆ ಮುದ್ದೆ
ನಿನ್ನ ಕೆನ್ನೆ
ಜೇನು ದೊನ್ನೆ


ಕೆಂಪು ಕೆಂಪು
ಗುಲಾಬಿ ಕೆಂಪು
ನನ್ನ ಮುದ್ದು
ತುಟಿ ಕೆಂಪು


ಗಲ್ಲ ಗಲ್ಲ
ಗುಳಿ ಗುಲ್ಲ
ಅಮ್ಮನ್ ಬೀಳ್ಸೋ
ರಸಗುಲ್ಲ

-ಮಾಲಾ ರಾವ್
(ಸೂಚನೆ-ಹಾಡು ಹೇಳುತ್ತಾ ಮಗುವಿನ ಮುಖದ ಆಯಾಯಾ ಭಾಗವನ್ನು ಮೃದುವಾಗಿ ಮುಟ್ಟಿ ಸವರಿ ಹಾಡಿದರೆ ಮಗು ಒಳ್ಳೇ ಪ್ರತಿಕ್ರಿಯೆ ತೋರುವುದಲ್ಲದೇ ಆ ಭಾಗಗಳ ಪರಿಚಯವನ್ನೂ ಮಾಡಿಕೊಟ್ಟಂತಾಗುತ್ತದೆ)

Tuesday, November 6, 2007

ಯಾರೀ ಚಿಣ್ಣ...?


ಯಾರೀ ಚಿಣ್ಣ ಕೇದಿಗೆ ಬಣ್ಣ
ಘಮ ಘಮ ಬಂಗಾರ ಸಣ್ಣ
ನಕ್ಕರೆ ಸಾಕು ಬಿಚ್ಚಿದಂತೆಲ್ಲೂ
ಬೆಳಕಿನ ಪತ್ತಲವನ್ನ!

-ಎನ್.ಎಸ್.ಎಲ್. ಭಟ್ಟ

Saturday, August 25, 2007

ತಿಂಗಳ ಸಂಭ್ರಮ


ಇವತ್ತಿಗೆ ಅಮ್ಮುವಿಗೆ ಮೂರು ತಿಂಗಳು ತುಂಬಿತು.ನಂದಗೋಕುಲಕ್ಕೆ ಒಂದು ತಿಂಗಳು...ನನ್ನ ಈ ಎರಡು ಕೂಸುಗಳಿಗೂ ಅಮ್ಮನ ಎದೆ ತುಂಬಿದ ಹಾರೈಕೆಗಳು...
ಒಂದು ತಿಂಗಳಲ್ಲಿ ನಂದಗೋಕುಲ ಹೇಗೆ ಬೆಳೆದಿದೆ..?ಅಂತ ಕೇಳಿಕೊಂಡರೆ ತೃಪ್ತಿಯೆನಿಸುವುದಿಲ್ಲ ಆದರೆ ಆರೋಗ್ಯ ಅಷ್ಟೇನು ಚೆನ್ನಾಗಿಲ್ಲದ ಮಗುವಿನ ಅಮ್ಮನಿಗಿರುವ ಮಿತಿಯನ್ನು ನೀವೆಲ್ಲರೂ ಅರ್ಥ ಮಾಡಿಕೊಳ್ಳುತ್ತೀರೆಂದು ಆಶಿಸುವೆ...
ನಂದಗೋಕುಲದಲ್ಲಿ ಹೊಸ ಹೊಸ ಹಾಡುಗಳನ್ನೂ,ಹಳೆಯ ಅಪರೂಪದ ಗೀತೆಗಳನ್ನೂ ತರುವ ಪ್ರಯತ್ನ ಮಾಡುತ್ತಿದ್ದೇನೆ ಸದ್ಯದಲ್ಲೇ ಅವೆಲ್ಲಾ ನಿಮಗೆ ಕಾಣ ಸಿಗುತ್ತವೆ
ಮಕ್ಕಳಿಗಾಗಿ ಎಂದು ಕನ್ನಡದಲ್ಲಿ ಇರುವ ತಾಣಗಳು ಬಲು ಕಮ್ಮಿ.ಗೆಳತಿ ಮೀರಾಳ
`ನಿಶು ಮನೆ' ಬಿಟ್ಟರೆ ಇನ್ಯಾವುದೂ ನನ್ನ ಕಣ್ಣಿಗೆ ಬಿದ್ದಿಲ್ಲ.ಹಾಗಾಗಿ ಮಕ್ಕಳಿಗಾಗಿರುವ ಕನ್ನಡ ತಾಣವೊಂದರಸ್ವರೂಪ ಹೇಗಿರ ಬೇಕು ಎಂಬುದರಿಂದ ಹಿಡಿದು ಪ್ರತಿ ಅಂಶವೂ ಇಲ್ಲಿ ಸವಾಲೇ...ಸಮಯ ಮತ್ತು ಸಂಪನ್ಮೂಲ ಎರಡೂ ಇಲ್ಲದ ನನ್ನಂತವರಿಗಂತೂ ಇದು ಬಲು ದೊಡ್ಡ ಸವಾಲು!
ಆದರೆ ಕನ್ನಡದ ಕಂದರ ಮೇಲಿನ ಮಮತೆ,ನಿಮ್ಮೆಲ್ಲರ ಉತ್ತೇಜನ ಈ ಎಲ್ಲಾ ಸವಾಲುಗಳನ್ನು ಉತ್ಸಾಹದಿಂದ ಎದುರಿಸಲು ನನಗಿರುವ ಸ್ಪೂರ್ತಿ...
ಇವತ್ತಿನ ವಿಶೇಷ ಅರವಿಂದ ತೆಗೆದ ಒಂದು ಅಪರೂಪದ ಚಿತ್ರ ನಾನು ಬರೆದ ಪದ್ಯದೊಂದಿಗೆ...

ಪಿಳಿ ಪಿಳಿ ಕಣ್ಣು ನೇರಳೆ ಹಣ್ಣು

ಗುಲಾಬಿ ಕೆನ್ನೆ ಜೇನಿನ ದೊನ್ನೆ

ಕುಲು ಕುಲು ನಗೆ ಸಿಹಿ ಸಿಹಿ ಸಜ್ಜಿಗೆ

ಪುಟ್ಟ ಪುಟ್ಟ ಹೆಜ್ಜೆ ಗಿಲಿಲ್ಗಿಲಿ ಗೆಜ್ಜೆ

ಪುಟಾಣಿ ಹೊಟ್ಟೆ ಕನ್ನಂಬಾಡಿ ಕಟ್ಟೆ

ಅಮ್ಮನ ಮುದ್ದೇ...ಮೈಯೆಲ್ಲಾ ಒದ್ದೆ!

Wednesday, August 22, 2007

ಮಗಳಿಗೊಂದು ಲಾಲಿ ಹಾಡು-೨

ಪುಟಾಣಿ ಆಯುಷಿ

ಪಾರ್ವತಿಯನ್ನು ತೂಗಿದ ಹಾಡು
(ತೂಗೀರೆ ರಾಯರ ಟ್ಯೂನ್ ನಲ್ಲಿ)

  1. ತೂಗಿದಳು ಪಾರ್ವತಿಯ
    ತೂಗಿದಳು ಶಾಂಭವಿಯ
    ತೂಗಿದಳು ಸಿರಿಮೊಗದ ಗಿರಿಜೆಯಾ....
    ತೂಗಿದಳು ಮೇನೆಯು
    ಅರಮನೆಯ ಅರಗಿಣಿಯ
    ತೂಗಿದಳು ಮುದ್ದಾದ ಗೌರೀಯ....





  2. ಬೆಳ್ಳಿಯ ತೊಟ್ಟಿಲಲಿ
    ರೇಶ್ಮೆಯ ಮೆತ್ತೆಯಲಿ
    ಮುದ್ದಾಗಿ ಮಲಗೆಂದು ತೂಗಿದಳು
    ರತ್ನದ ಮೇಲ್‌ ಹೊದಿಕೆ
    ಮುತ್ತಿನ ತೆರೆ ಹಾಕಿ
    ಇಂಪಾಗಿ ಹಾಡುತ್ತಾ...ತೂಗಿದಳು




  3. ಮೊಗವಂತು ಚಂದಿರನು
    ನಗುವಂತು ಮಲ್ಲಿಗೆಯು
    ಬೆಳಕಾಗಿ ಇರುವಳು ಮನೆಗೆಲ್ಲಾ...
    ಮೂರು ಲೋಕದ ಸಿರಿಯು
    ಮನೆ ತನಕ ಬಂದಿತು
    ಮುತ್ತಾಗಿ ತುಂಬಿತು ಮಡಿಲನ್ನ...

ಮಗಳಿಗೊಂದು ಲಾಲಿ ಹಾಡು


ಸೀತೆಯ ಲಾಲಿ ಹಾಡು

ಲಾಲಿ ಲಾಲಿ ಲಾಲಿ ಲಾಲಿ (2 ಸಾರಿ)
ಭೂಜಾತೆ ಸೀತೆಗೆ ಸಿರಿನುಡಿಯ ಲಾಲಿ ।

ಮಿಥಿಲಾದ ಮುತ್ತೀಗೆ ಮುದ್ದಾದ ಲಾಲಿ ।(2 ಸಾರಿ)
ಸಿರಿದೇವಿರೂಪಕ್ಕೆ...ಆ..ಆ..ಆ..ಆ..ಸಿಂಗಾರ ಲಾಲಿ
ಶ್ರೀರಾಮ ರಾಣಿಗೆ ಸವಿನುಡಿಯ ಲಾಲಿ

ಲಾಲಿ ಲಾಲಿ ಲಾಲಿ ಲಾಲಿ (2 ಸಾರಿ)

ಹಾಲ್ಗಡಲಿಂದೆದ್ದವಳೆ ಮಂದಾರ ಲಾಲಿ (2 ಸಾರಿ)
ಹುಣ್ಣಿಮೆಯ ಮೊಗದವಳೆ ಹೂಮಳೆಯ ಲಾಲಿ
ಕಮಲಾಂಗಿ ಸೀತೆಗೇ... ಕಸ್ತೂರಿ ಲಾಲಿ
ಜಲಜಾಕ್ಷಿ ಜಾನಕಿಗೆ ಜಯಜಯವೆ ಲಾಲಿ

ಜೋ...ಜೋ...ಜೋ...ಜೋ...ಜೋ...
ಮಿಥಿಲೇಶ ಜನಕನದು ಮೆಲು ಮಾತ ಲಾಲಿ (2 ಸಾರಿ)
ಸುಮೇಧದೇವಿಯದು ಸಂಗೀತ ಲಾಲಿ

ವೇದವತಿ ಅಂಶಜೆಗೆ ವೇದ-ನಾದ ಲಾಲಿ
ಸುರ ಸಾಧು ಪೂಜಿತೆಗೆ ಜಯಜಯವೀ... ಲಾಲಿ

*******************

ಹೆಣ್ಣುಮಗುವಿನ ಬಗ್ಗೆ ನಮ್ಮ ಸಮಾಜದಲ್ಲಿರುವ ತಾತ್ಸಾರವನ್ನೂ ,ತಣ್ಣನೆಯ ಕ್ರೌರ್ಯವನ್ನೂ ಹಾಸ್ಯದ ಲೇಪನದೊಂದಿಗೆ ಹೇಳುವ ಪ್ರಯತ್ನ ಮಾಡಿ ನಾನು ಬರೆದ ಕಥೆ ಮಗಳಿಗೊಂದು ಲಾಲಿ ಹಾಡು ಹೆಣ್ಣುಮಗುವಿಗೆ ನಮ್ಮಲ್ಲಿ ಸಾಕಷ್ಟು ಲಾಲಿ ಹಾಡು ಏಕಿಲ್ಲ ಎಂಬ ಪ್ರಶ್ನೆ ಎತ್ತಿ ಎರಡು ಲಾಲಿ ಹಾಡುಗಳನ್ನು ಕಥೆಯಲ್ಲಿ ಸೇರಿಸಿದ್ದೆ. ಅವುಗಳಲ್ಲೊಂದು ಈ "ಸೀತೆಯ ಲಾಲಿ ಹಾಡು" ಇದು ಸ್ವಾತಿಮುತ್ತು ಚಿತ್ರದ 'ಶ್ರೀಚಕ್ರಧಾರಿಗೆ' ಟ್ಯೂನ್ ನಲ್ಲಿದೆ
*******************
ಚಿತ್ರ-ಸ್ವಾತಿ ಮುತ್ತು
ಗಾಯಕಿ-ಚಿತ್ರ
ಹಾಡು ಕೇಳಿ

ಲಾಲಿ ಲಾಲಿ ಲಾಲಿ ಲಾಲಿ
ಶ್ರೀಚಕ್ರಧಾರಿಗೆ ಶಿರ ಬಾಗಿ ಲಾಲಿ
ಜೀವ ನೇತ್ರನಿಗೆ ರಮಣೀಯ ಲಾಲಿ
ಹಾಲ್ಗೆನ್ನೆ ಕೃಷ್ಣನಿಗೆ ಹಾಲ್ಜೇನ ಲಾಲಿ
ಜಗವಾಳೋ ಸ್ವಾಮಿಗೆ ಪದಮಾಲೆ ಲಾಲಿ

ಕಲ್ಯಾಣರಾಮನಿಗೆ ಕೌಸಲ್ಯ ಲಾಲಿ
ಯದುವಂಶ ವಿಭುವಿಗೆಯಶೋದೆ ಲಾಲಿ
ಪರಮೇಶ ಸುತನಿಗೆ ಪಾರ್ವತಿಯ ಲಾಲಿ
ಧರೆಯಾಳೊವಾತನಿಗೆ ಶರಣೆಂಬೆ ಲಾಲಿ

ಜೋ ಜೋ ಜೋ ಜೋ

ಶ್ರೀಕನಕದಾಸರದು ಕೃಷ್ಣನಿಗೆ ಲಾಲಿ
ಲಿಂಗಕ್ಕೆ ಜಂಗಮರ ವಚನಗಳ ಲಾಲಿ
ವೇದವೇದ್ಯರಿಗೆ ವೇದಾಂತ ಲಾಲಿ
ಆಗಮ ನಿಗಮವೆ ಲಾಲೀಗೆ ಲಾಲಿ