Saturday, May 3, 2008

Thursday, May 1, 2008

ಪೀಕುದಾನಿಯೊಂದರ ಕಥೆ...


ಈಗಿನ ಕಾಲದವರಿಗೆ ಪೀಕುದಾನಿಯನ್ನು ಸ್ವಲ್ಪ ವಿವರಿಸಬೇಕು ಅದು ಸಾಮಾನ್ಯವಾಗಿ ಅಗಲ ಪರಾತದಂತೆ ಇದ್ದು
ಮಧ್ಯದಲ್ಲಿ ಗುಂಡಿಯಂತೆ ತಗ್ಗು ಇರುತ್ತದೆ. ಹಿಂದಿನಕಾಲದಲ್ಲಿ ರಾಜ ಮಹಾರಾಜರುಗಳು,ದೊಡ್ಡ ದೊಡ್ಡ ಶ್ರೀಮಂತ ರಸಿಕರು ,ಹಗಲು-ರಾತ್ರಿ ತಾಂಬೂಲ ಜಗಿಯುವಂತ ರಸಿಕತೆ ಇದ್ದವರು) ತಾವು ಇತರ ಕೆಲಸಗಳಲ್ಲಿ ಬಿಸಿಯಾಗಿದ್ದಾಗ ಅಗಿದ ತಾಂಬೂಲ ತುಪ್ಪಲು ಇಂಥಾ ಪೀಕುದಾನಿಗಳನ್ನೂ ಮತ್ತು ಈ ಪೀಕುದಾನಿ ಹಿಡಿಯಲು ಜನವನ್ನೂ ಇಟ್ಟು ಕೊಂಡಿರುತ್ತಿದ್ದರಂತೆ
ನಮ್ಮನೆಯಲ್ಲಿ ಪೀಕುದಾನಿಯೂ ಜನವೂ ಎರಡೂ ಇಲ್ಲ ನಾವೇನು ಮಾಡೋಣಾ ಸ್ವಾಮೀ..?
*************
ಕಿಟ್ಟಣ್ಣನಿಗೆ ಹಲ್ಲು ಬರುತ್ತಿವೆ ನಮ್ಮಿಬ್ಬರನ್ನೂ(ಸಾಮಾನ್ಯವಾಗಿ) ವೀಕೆಂಡಿನಲ್ಲಿ ಸಿಗುವ ನಮ್ಮ ಅದೃಷ್ಟಶಾಲಿ ಸ್ನೇಹಿತರನ್ನೂ
ಹಾ...! ಅಂತ ಕಿರುಚಿಕೊಂಡು ಮುಟ್ಟಿ ನೋಡಿಕೊಳ್ಳುವಂತೆ ಕಚ್ಚುತ್ತಾನೆ ಮತ್ತು ಬಹುಮಾನವಾಗಿ ವದೆ ತಿನ್ನುತ್ತಾನೆ
ಎಲ್ಲಾ ಸೈಜಿನ, ಶೇಪಿನ, ಟೆಕ್ಸ್ಚರಿನ ಟಿತರ್ ಗಳನ್ನು ತಂದು ಸುರಿದಿದ್ದೇವೆ ಅವುಗಳೊಂದೂ ಅವನಿಗೆ ಸೇರವು
ಕೊನೆಗೆ ಕ್ಯಾರೆಟ್ಟ್ ಬೀಟ್ರೂಟ್ ಗಳ ಪ್ರಯೋಗವೂ ಆಯಿತು
ಜೊತೆಗೆ ಜೊಲ್ಲು...
*********
ಅಹಾ..!ಜೊಲ್ಲೆಂದರೆ ಅದರ ಕಥೆ ಏನು ಕೇಳುತ್ತೀರೀ...
ಅಂಗಿಯ ಮೇಲೆ ಜೊಲ್ಲು... ನೆಲದ ಮೇಲೆ ಜೊಲ್ಲು... ಸೋಫಾದ ಮೇಲೆ ಜೊಲ್ಲು...ನನ್ನ ಚೂಡೀಧಾರದ ಮೇಲೂ ಜೊಲ್ಲು...
ಅಪ್ಪನ ಶರ್ಟಿನ ಮೇಲೂ ಡಿಟೋ...
ನಾನಾಡುವ ನುಡಿಯೇ ಜೊಲ್ಲಿನ ನುಡೀ....ಅಂತ ಅವನು ಹಾಡು ಹೇಳುವುದೊಂದು ಬಾಕಿ..!
***********
ಹಲ್ಲು ಬರುವಾಗ ಜೊಲ್ಲು ಬರುವುದು ತೀರಾ ಸಹಜ ಅನ್ನುತ್ತವೆ ಚೈಲ್ಡ್ ಕೇರ್ ಪುಸ್ತಕಗಳು
ಜೊಲ್ಲು ಸುರಿಸಿದಷ್ಟೂ ಬುದ್ದಿವಂತ ಆಗ್ತಾನೆ ಬಿಡು ಅಂತ ಕೆಲವರು ನಂಗೆ ಸಮಾಧಾನ ಹೇಳ್ತಿದಾರೆ
(ತಿಂಡಿಯನ್ನು ನೋಡಿ ಜೊ.. ಸುರಿಸುವ ಡುಮ್ಮಣ್ಣನೂ,ಹುಡಿಗಿ ನೋಡಿ ಜೊ.. ಸುರಿಸುವ ಕಚಡಾನೂ,ನಾಯಿ ಬೆಕ್ಕುಗಳೂ ಹಾಗಾದ್ರೆ ತುಂಬಾ ಬುದ್ದಿವಂತರಿರಬೇಕು!)
************
ಮೊನ್ನೆ ಮಧ್ಯ ರಾತ್ರಿ ಅರವಿಂದ ಜೋರಾಗಿ ಕೂಗುತ್ತಾ ಹಾಸಿಗೆಯಿಂದ ಎಗರೆಗರಿ ಬೀಳಲು ಶುರುಮಾಡಿದ
ಗೊರಕೆ ಹೊಡೀತಿದ್ದ ನಾನು ಎದ್ದು ಗಾಭರಿಯಿಂದ 'ಏನಾಯ್ತು..ಏನಾಯ್ತು...?"ಅಂತ ಕಿರುಚಿದೆ
ಅವನು ಕೋತಿಯಂತೆ ಹಲ್ಲು ಕಿರೀತಿದ್ದ ಕಿಟ್ಟಣ್ಣನನ್ನು ಉರಿಗಣ್ಣಿನಿಂದ ನೋಡುತ್ತಾ ತನ್ನ ಕಿವಿಯೊಳಗೆ ಬೆರಳು ಹಾಕಿ ಅಲ್ಲಾಡಿಸಿಕೊಳ್ಳುತ್ತಿದ್ದ
ಏಕೆಂದರೆ ಬಾಯಿತುಂಬಾ ಸುಮಾರು ಜೊಲ್ಲು ತುಂಬಿಕೊಂಡಿದ್ದ ಕಿಟ್ಟಣ್ಣ ಮಲಗಿದ್ದ ಅಪ್ಪನ ಕಿವಿಯನ್ನೇ
ಪೀಕುದಾನಿ ಮಾಡಿಕೊಂಡು ಬಿಟ್ಟಿದ್ದ!

Thursday, April 24, 2008

ಮೂವರು ಮಾಂತ್ರಿಕರು

ನಾಗಾರ್ಜುನ-ಶ್ರೀನಿಧಿ-ಅಮರ್ತ್ಯ


Nagarjuna-Shrinidhi-Amartya

Tuesday, April 22, 2008

SAMHITA


ಒಂದು ನಗು ಹೂನಗೆ

ಇನ್ನೊಂದು ನಗು ಹಾಲ್ನಗೆ

ಮತ್ತೊಂದು ನಗು ಜೇನ್ನಗೆ

ನೂರು ನಾರಿ ನಕ್ಕ ಮೇಲೂ

ಇನ್ನೂ ಸುರಿವಳು,

ನಗೆ ಮಲ್ಲಿಗೆ...

Sunday, April 20, 2008

ಕಿಟ್ಟಣ್ಣನ ಹೊಸ ಪ್ರೇಮ

ಕಿಟ್ಟಣ್ಣನ ಪೇಪರ್ ಪ್ರೇಮದ ಬಗ್ಗೆ ನನಗೆ ಗೊತ್ತಿತ್ತು

ಅವನ ಸ್ಟೀಲ್ ಪಾತ್ರೆಗಳ ಮೇಲಿನ ಮೋಹದ ಬಗ್ಗೆ ಗೊತ್ತಿತ್ತು

ಕೊನೆಗೆ ಅವನಿಗೆ ವೈರುಗಳೂ,ಬ್ಯಾಟರಿಗಳೂ ಮುರಿದ ಪೆನ್ನುಗಳೂ ಇಷ್ಟವೆಂದು ಗೊತ್ತಿತ್ತು

ಆದರೆ ಅವನ ಈ ಹೊಸಪ್ರೇಮದ ಬಗ್ಗೆ ದೇವರಾಣೆ ಗೊತ್ತಿರಲಿಲ್ಲ


ಆದಿದಿಷ್ಟು...

ಕಳೆದವಾರ ನಾನು ಏನು ಮಾಡಿದರೂ ನಮ್ಮಮನೆಯ ಟಿವಿ ನನ್ನಿಷ್ಟದ ಪುರಾತನ ಸೀರಿಯಲ್ಗಳನ್ನು ಬಾರೀಬಾರೀ

ರಿಪೀಟ್ ಮಾಡುವ ಟಿಬೀಯಸ್ ಚಾನಲ್ಲನ್ನು ತೋರಿಸೊಲ್ಲ ಅಂತ ಹಟ ಹಿಡಿದು ಕೂತುಬಿಟ್ಟಿತ್ತು

ಸರಿ ಸಂಜೆ ಮನೆಗೆ ಬಂದ ಅರವಿಂದನಿಗೆ ಟಿವಿಗೆ ಏನೋ ಆಗೋಗಿದೆ ಕಣೋ ಟೀಭೀಯಸ್


ಬರ್ತಾಇಲ್ಲಾ...ಹಾಕ್ಕೊಡೋ...ಅಂತ ಗೋಗರೆದೆ ರಿಮೋಟ್ ತೊಗೊಂಡು ಟ್ರೈ ಮಾಡಿದವನು ಇದೇನಿದು ಅಂತ

ಹುಬ್ಬೇರಿಸುತ್ತಾ ಮನೆಗೆ ಬಂದವರ್ಯಾರಾದ್ರೂ ರಿಮೋಟ್ ಮುಟ್ಟಿದ್ರಾ...ಅಂತ ಕೇಳುವುದಕ್ಕೂನಾನು

ಅಡ್ಡಡ್ಡವಾಗಿ ತಲೆ ಆಡಿಸುವುದಕ್ಕೂ ಸರಿಯಾಗಿ ಕಿಟ್ಟಣ್ಣ ಅವನ ಮೂರೂಮುಕ್ಕಾಲು ಹಲ್ಲು ತೋರಿಸುತ್ತಾ

ಹ್ಹಿ...ಹ್ಹಿ...ಹ್ಹಿ ಅಂತ ನಗುವುದಕ್ಕೂ ಸರಿಯಾಯಿತು ಬೆಳಗ್ಗೆ ಕಿಟ್ಟಣ್ಣ ರಿಮೋಟ್ ಹಿಡಕೊಂಡು ಆಟ

ಆಡ್ತಾಇದ್ದ...ಅಂತ ನಾನು ನೆನಪಿಸಿಕೊಂಡು ಹೇಳುತ್ತಿರುವಾಗಲೇ`ಇವನು ಅಯ್ಯೋ...ಪೋಕರಿ...'ಅಂತ

ಕಿಟ್ಟಣ್ಣನೆಡೆ ನುಗ್ಗಿದ ನಾನು ಮಿಕ ಮಿಕ ಇಬ್ಬರ ಮುಖನೋಡಿದೆ

ಈಗ ಸ್ವಲ್ಪ ಸೀನ್ ರೀವೈಂಡ್

ಬೆಳಗ್ಗೆ ನಾನು ಅಡುಗೆ ಮನೆಯಲ್ಲಿ ಬಿಸಿ ಯಾಗಿರುವಾಗ ರಿಮೋಟ್ ನೊಂದಿಗೆ ಆಡುತ್ತಾ ಆಡುತ್ತಾ ಕಿಟ್ಟಣ್ಣ `ಆನ್


ಡಿಮಾಂಡ್'ಎಂಬ ಪೇಯ್ಡ್ ಚಾನಲ್ ನಲ್ಲಿ ಯಾವುದೋ ಇಂಗ್ಲಿಷ್ ಮೂವಿ ಆರ್ಡರ್ ಮಾಡಿ ಬಿಟ್ಟಿದ್ದಾನೆ (ಮತ್ತು

ಮೂವಿ ಪ್ರಸಾರವಾಗುತ್ತಿರುವಾಗ ಚಾನಲ್ ಬದಲಿಸಿ ಬಿಟ್ಟಿದ್ದಾನೆ)ಅದು ಸಾಲದೆಂದು ಮತ್ತೆ ಮೂರು

ಸಿನಿಮಾಗಳನ್ನು ಕ್ಯೂನಲ್ಲಿ ಬೇರೆ ನಿಲ್ಲಿಸಿಕೊಂಡಿದ್ದಾನೆ!!!ನಂತರ ಸಿಕ್ಕಪಟ್ಟೆ ಬಟನ್ ಗಳನ್ನು ಒತ್ತಿಬಿಟ್ಟಿದ್ದರಿಂದ ಟಿವಿ

ಮುನಿಸಿಕೊಂಡು ಬಿಟ್ಟಿದೆ

*************

ಈಗ ಐದು ಡಾಲರ್ ನ ಬಿಲ್ಲು ಬಂದಿದೆ ಐದೇ ಡಾಲರ್ ಅಲ್ಲ ಸದ್ಯ ಅಂತ ಖುಷಿ ಪಡಬೇಕಾ ಅಥ್ವಾ ಇವ್ನು

ಇನ್ನೇನೇನು ಮಾಡ್ತಾನೋ ಅಂತ ಟೆನ್ಶನ್ ಮಾಡೋ ಬೇಕಾ ಅಂತ ಗೊತ್ತಾಗುತ್ತಿಲ್ಲ ನನಗೆ...



Monday, April 7, 2008

ಕಿಟ್ಟಣ್ಣ ನ ಹೊಸ ಯುಗಾದಿ ಹಾಡು


ಯುಗಾದಿ ಹಬ್ಬ ಬಂತಣ್ಣ


ಹೋಳಿಗೆ ತುಪ್ಪ ಹೊಡೆಯೋಣಾ


ಲಕ ಲಕ ಲಕ ಲಕ....




ಬೇಲದ ಪಾನಕ ಕುಡಿಯೋಣ


ಮಾವಿನ ಮಿಡಿಗಳ ಮೆಲ್ಲೋಣ


ಮಿ ಮಿಮ್ ಮಿ ಮಿಮ್.....



ಜುಮ್ಮನೆ ಜೋಕಾಲಿ ಜೀಕೋಣಾ


ಬಿದಿಗೆ ಚಂದಿರ ನೋಡೋಣಾ


ನಾ ನಿನ್ ನಾ ನಿನ್......



ಕಿಟ್ಟಣ್ಣ ನ ಅಮ್ಮನ ಟಿಪ್ಪಣಿ-ಪ್ರತಿ ನುಡಿಯ ಕೊನೆಯ ಸಾಲು ಅಮ್ಮು ಆಲಿಯಾಸ್ ಕಿಟ್ಟಣ್ಣನ ಇತ್ತೀಚಿನ ತೊದಲು ನುಡಿಗಳು...!


ಮಿಕ್ಕಿದ್ದು ನಾನು ಸೇರಿಸಿದ್ದು


Thursday, April 3, 2008

ನನ್ನ ಕೃಷ್ಣ


ಅಳಬೇಡೋ ನನ್ನ ಕೃಷ್ಣ
ಹಾಲು ಮಾರಿ ಬರ್ತೀನಿ
ಕಾಲಿಗೆ ಕಡಗ ತರ್ತೀನಿ
ಮೊಸರು ಮಾರಿ ಬರ್ತೀನಿ
ಹಸಿರು ಅಂಗಿ ತರ್ತೀನಿ
ಬೆಣ್ಣೆ ಮಾರಿ ಬರ್ತೀನಿ
ಬಣ್ಣದ ಗಿಲಕಿ ತರ್ತೀನಿ
ತುಪ್ಪ ಮಾರಿ ಬರ್ತೀನಿ
ಒಪ್ಪಿದ ಹುಡುಗಿ ತರ್ತೀನಿ
ಅಳಬೇಡೋ ನನ್ನ ಕೃಷ್ಣ

Tuesday, April 1, 2008

ಹಲ್ಲುಜ್ಜುವ ಹೊಸ ವಿಧಾನ

ಬೆಳಗ್ಗೆ ಎದ್ದು ನೀವು ಹಲ್ಲುಜ್ಜುತ್ತೀರಾ ತಾನೇ...(ಸದ್ಯ ...!) ಇದು ಹಲ್ಲುಜ್ಜುವ

ಹೊಸ ವಿಧಾನ ನಾನೇ ಕಂಡು ಹಿಡಿದಿದ್ದು ಪೇಟೆಂಟ್ ಮಾಡಿಸ್ ಕೊಳಣಾ

ಅಂತಿದೀನಿ ಏನಂತೀರೀ....?

Do you brush every morning...? this is the new method

of brushing i've invented....planning to get a patent....




ಆಹಾ...! ದಿವ್ಯಾನಂದ ಈ ವಿಧಾನ ನೀವೂ ಒಮ್ಮೆ ಟ್ರೈ ಮಾಡಿ....
why don't you try my new method it's wonderful....

Friday, March 28, 2008

ಮಲ್ಲಕ್ಕನ ಕಥೆ..!

ಶಾಲೆಗೆ ಹೋಗೇ ಮಲ್ಲಕ್ಕ
ಪಾಟಿ ಪುಸ್ತಕ ಇಲ್ಲಕ್ಕ
ಕಸೂತಿ ತೆಗೆಯೇ ಮಲ್ಲಕ್ಕ
ಸೂಜಿ ದಾರ ಇಲ್ಲಕ್ಕ
ಮುಸುರೆ ತೊಳೆಯೇ ಮಲ್ಲಕ್ಕ
ಮೈ ಕೈ ಎಲ್ಲಾ ನೋವಕ್ಕಾ
ನೀರು ಸೇದೇ ಮಲ್ಲಕ್ಕ
ಸೇದೋ ಹಗ್ಗ ಇಲ್ಲಕ್ಕ
ಊಟಕೆ ಬಾರೇ ಮಲ್ಲಕ್ಕ
ಬಂದೆನು ಬೇಗ ಬಡಿಸಕ್ಕ
***********************
ಅಮ್ಮುವಿನಮ್ಮನ ಟಿಪ್ಪಣಿ-
ಈ ಮಲ್ಲಕ್ಕ ಯಾರು ಅಂತ ಗೊತ್ತಾಯ್ತಲ್ಲಾ...!
ನಾವೆಲ್ಲಾ ಚಿಕ್ಕವರಿದ್ದಾಗ ಇದನ್ನೇ ಹೋಲುವ 'ತೋಟಕೆ ಹೋಗೋ ತಿಮ್ಮ'
ಹಾಡುತ್ತಿದ್ದೆವು ಮಲ್ಲಕ್ಕನ ಹಾಡು ಮತ್ತು ಇತರ ಹಲವು ಮಕ್ಕಳ ಹಾಡುಗಳನ್ನು ನನಗೆ ತಮ್ಮ ಸಂಗ್ರಹದಿಂದ ಕೊಟ್ಟವರು ನಮ್ಮ ನಂಜಮ್ಮ ಟೀಚರ್ ಅವರಿಗೆ ಧನ್ಯವಾದಗಳು